دەربازبوون ژ غوبارێ

سەبری سلێڤانەیی

دەربازبوون ژ غوبارێ، یان ژ بەرزەخا مرنێ، یان ژی ژ چیایێن کەرب و کینێ د دەروونا بەشەران دا؟

باش ل بیرا منە، دەمێ دەرهینەرێ ژێهاتی شەوکەت ئەمین کورکی بەری چەند سالان فلمێ خوە "دەربازبوون ژ غوبارێ" ل هۆلا ئێکەتییا نڤیسەرین کورد تایێ دهۆکێ پێشکیشی مە کری، ئەز و چەند هەڤالەک ژی ئامادە بوون، ل دەستپێکا فلمی راپۆرتەک دەربارێ فلمی و بەشدارییا وی د فەستیڤالێن نێڤدەولەتی دا هاتە نیشادان، هەژی گۆتنی یە کو گەلەک خەلات وەرگرتینە، نزانم دەرهینەر یان ئەکتەرەک بیانی بوو، گۆت: "هەرکەسێ بەرێ خوە بدیتە ڤی فلمی، دێ رۆندکان بارینت!"

هینگێ هەڤالەکێ من ل تەنشتا من، دەڤێ خوە هینا بەر گوهێ من و گۆت: "ها بۆتە ڤێ کلینسێ چونکی دیارە رۆندکێن تە ژی دێ بارن!" ئەز گرنژیم و من گۆتێ: "راستە ئەزژی دگریم، بەلێ نە بۆ هەرتشتی"، پاشی دگەل خوە من گۆتە خوە: "تو بێژی ئەڤ فلمە رۆندکێن من ژی ببارینت؟!"

دەربارێ گریانێ درێژ ناکم، فلم دەست پێکر و ب دوماهیک ژی هات و ئەز ژی وەک گەلەک هەڤالێن دی د هۆلێ دا نە بەس گریام، بەلێ تێرا عەمرێ چوویی و مایی ژی گریام.

ئەڤ فلمە، نە ب تنێ فلمەک بوو مە دیتی، بەلێ داستان و تراژیدییا سەدان سالان بوو، کو هەر کێلیکەکێ مە ناڤەک لی دکر، بەلێ ل دوماهیکێ هەر تراژیدی بوو... تراژیدییا ئینسانی، ئینسانێ خەما وی ژ هەمی سینۆران درێژتر، ئینسانێ دەنگێ وی ژ هەمی دروشم و گۆتنان بلندتر، ئینسانێ برینا وی ژ هەمی ساو و ساوێران کویرتر، ئینسانەک کو ژبلی حەژێکرن و رێزگرتنێ چو دی نیشا مە نادت، ئینسانەک ل جهێ تۆلڤەکرنێ مە فێر دکت لێبۆرینێ، ل جهێ کەرب و کینێ دەستێ مە دگرت و ب بلوورا خوە ئاوازا میهرەبانیێ بۆ روحا مە یا دەرزی دژەنت، ئینسانەک کو د نیڤا مرنێ دا گازی دکت چاوان بژین و د نیڤا ژیانێ دا، مادەم هەر دێ مرن، مە فێر دکت چاوان بمرن؟!

دەربازبوون ژ غوبارێ دیرۆکا زک و بنزکی شەرمزار دکت، ب دەنگەک بلند گازی مە دکت و دبێژت: "هێژ هوین بەشەرن، بەلێ کەنگی دێ بنە ئینسان؟!"

سەدان سالە ئەم وەک بەشەر دژین، دخون و ڤەدخون و دنڤن، بەلێ دەربازبوون ژ غوبارێ دبێژتە: "دەمە یێدی ببن ئینسان... بۆ خاترێ خاتران ببن ئینسان!"

سەدان سالە ئەم ژ هەڤ دویر دبن و سینۆر درێژتر دبن، ئەم دنالینن و برینێن مە کویرتر دبن، ئەم دگەرن و د گەریانێ دا بەرزە دبن ب تنێ چونکی مە ئینسانیەتا خوە ژدەستدا...

راستە ئەم د مرنەکا رۆژانە دا دژین و د ژیانەکا رۆژانە دا دمرن، بەلێ سەدان سالە نە ئەم ب دورستی دمرن ونە ژی ب دورستی دژین، دەربازبوون ژ غوبارێ دبێژیتە مە: "هەگەر وە بڤێت بژین دورست بژین و مادەم هەر دێ مرن ژخوە نەمرن!"

شەوکەت ئەمین کورکی، ئەو دەرهینەرێ بەژنا وی تەمەت بەژنا تراژیدییا رۆژهەلاتێ، حسێن حەسەن، ئەوێ کو نە ب لیهازەیان، بەلێ ب دلێ خوە چیایێن کینێ دهەرفینت، عادلێ بریندار کو ل دوماهیکێ ئینسان دناڤ دا بسەرکەڤتی، هەرسێ پێکڤە دەرسەکی ددن مە، دبێژن: "ئینسان بن ئینسان... ئەڤین، ئاشتی و تۆلێرانسی مە دگەهینت هەڤدوو، بەلێ کەرب و کین مە ژ هەڤدوو ڤەدقەتینن"، دیسان دبێژنە مە: "کا چاوان رۆژ ژ قاستا ناهەلیت، ئەها وەسان ژی مرۆڤ ژ قاستا ناهێتە ڤێ جیهانێ!"

دەربازبوون ژ غوبارێ، نە ب تنێ فلمەکە، بەلێ داستانا مرۆڤێن دلشکەستی یە، سترانا موسافرێن بێ ڤەگەرە، نالینا بریندارێن بیرهاتنانن، دەنگێ شکەستنا مرنەکا سەدان سالی یە و  ڤەدەنگێ ژیانەکا سەرمەدی یە.